مين اللى قال ان الحضاره فى المدن ...؟ للشاعر / .احمد بيومي

مين اللى قال ان الحضاره فى المدن ...؟
يا ساده .
.حضاره الانسان بدات بالزراعه وصناعه الرغيبف ..
صنعها انسان اتحد فى وجه المحن والخوف ..
وبصحيح الحضاره هنا فى الريف..
موش فى المدينه اللى بتسحق الانسان ..
لان الحضاره رقى وادب ..
مش بلطجه ..وفتونه ..وطوله لسان ..
.فيها الضعيف والفقير يتهان .
الحضاره احترام الكبير وعطف على الصغير ..
الحضاره غيطان ..وفرن وجرن .وعيل صغير فرحان ...
وقلوب صافيه بتحن على الغلبان ..
الحضاره لمه ..وراكيه ..وعافيه .وفن .
الحضاره خضار ونهار وليل سهار ..
حريه .بعيد عن السجن والسجان ..
.المصنوع من الحجر ومن الخرسان ..
والراحه لقيتها بصراحه هنا ..
على شط ترعه وفى ضل تكعيبه عنب ..
لما سمعت همس النخيل للشجر ..
لقيتها لما صاحبت نسمايه فى ضى القمر ..
لقيتها فى لمه اهل البلد ..
علشان يسلموا على واحد بسيط راجع من السفر..
لقيتها وسط الخضار والزهر ..
لقيتها مع صوت الفراخ والديوك والحمير والبقر ..
تخيلوا ..اخيرا جدا عرفت ان الحضاره..
هى انسجام مابين الطبيعه والبشر ..
وان الحضاره بتصنعها قلوب بتحب..
موش قلوب من صخر ...
  ..احمد بيومى