احضن قوى .....
ماتخافش من ليلك مصيره حَ ينطوى
ماتخافش من لوم العوازل وابتدى
سطر الكتابة ع النغم
واحضن بشوقك غنوتك
وارسم على اللحن اللى طالع بسمتك
تـَبــِّـت وعيش ، واحضن بشوقك صُحبتك
ماتخافش قلبك ينكوى ..
احضن قوى .....
أفراح نجومك فى السما
واحضن ربيع العمر لايموت فى الخريف
وازرع ورودك فوق جبال البرد
واحضن فى الدفا
ماتخليهوش يفضل مـتـَكـتِـك ،
طـَمـِّـنـُه وطبطب عليه
قلبك يمامة والجناح فارد على
شمسُه اللى غابت والقمر بيمر طيف ..!
فينك ياصيف ؟!
فين الجناين والصبا ، وفين الصحاب ..؟!
فين النفوس الطيبة ، وفين العتاب ..؟!
فين الربيع ؟ ، فين المطر ؟ ، فين السحاب ..؟!
فين حلمنا وقت العصارى باللـُّـقا وَيــَّـا الحبيب
ياكــــــون غريب عن دنيتى أمرك عجيب ..!
فــارد عـيوبــــك وسطنا ،
مين اللى جابك عندنا ..؟!
مين اللى خلاك تفترى وتحضن قوى
إحساس ..؛ وناس .....؟!
كانت بتفرش حلمها والكون وسيع ..؟!
وازاى يضيع ..؟
قلب اللى راسم ضحكته رغم الهموم ..؟!
حتى الرضيع
رافض يشارك رضعته أخ وشقيق ...!
خليك رقيق ...
وابعد سهامك عننا وارحل بعيد
خلينا نقدر نبتدى الحلم البرئ
ونجدد اليوم اللى طالل م السنة بحلمه الجرئ
ياكل خايف م الزمن .. ربك كريم ..؛
قادر يـبَـدِّل يأسِـنا فرح وأمل
ويمَـشـِّـى يومك ع الصراط المستقيم ..؛
ربك عظيم
فاتح طريق لـ اللى ابتدوا يضِلوا الطريق
قايد شموع المرحمة بـتـغـسِـل ذنوب
غافر وساتر للعيوب
بس انت تــَبـِّـت فى المعانى اللى اتـبـَنـِت
وقت الولادة فى القلــــوب
وارجع لربك وَحـِّـدُه ، وادخل بحبك للحدود
واسجد وطـَوِّل فى السجود
وافتح بيبانك للفرح وانسى الألم
ماتخافش من لوم العوازل وابتدى
سطر الكتابة ع النغم
واحضن بشوقك غنوتك
وارسم على الفجر اللى طالع بسمتك
ليلك مصيره حَ ينطوى
تـَبــِّـت وعيش ، واحضن بشوقك صُحبتك
ماتخافش قلبك ينكوى ..
احضن قوى .....
ليست هناك تعليقات:
إرسال تعليق