ميَل ياصَبر && بقلم صفاء عبد ربه

 

 

ميَل ياصَبر
*********
مَيل ياصَبر مَيل
مَيل عَلينا وإتحَمل
دا أنا جَرحِي مالُه حُدود
(عَديت) جُسُور وسدود
لا يوم قولت الأه
ولا الصَبر ( مَرَه )عِرِفنا مَداه
ياصَبر لَما قالوا عَليك أمَيل
قولت ياصَبر أيوب
لإمتَيَّ أنا راح أتحَمل
دا أنا مِش قادره أتخََيل
أن حِلمي يكون سَراب
وإني بَجري ورا أمَل كَداب
العُمر ضَاع مابين عَذاب وعِتاب
لا الحِِلم حَقَقَتُه
ولا الأمَل دَفَنتُه
ولا الصَبر صَدَقتُه
ولاعُدت قادره علي المَكتوب
وف دروب الهَم وَحدي ألف وأجوب
لا أنا حَصَدت نِتاج زَرعي
ولا جَف في يوم دَمعي
ولا قادر أقول الآااااااااااه
لإمتي ياصبر راح أتحَمل
قالوا عِدي البُحور
راح تِلاقي ورود وقُصور
ومَلايكَه قاعده هناك
أنا قولت خَلاص راح أتحَرَر
والحَظ مَعايا يتغَير
قالوا لِسَه ياخَيبَه
لما دُنيتِك تتغَير
أنا قولت دِي دُنيتي غابه
مَليانه بالديابه
فيها وحوش ونمور
عَلينا بِتدوس وتُجور
ومَهما أصرُخ وأقول
الدُنيادي مِش دنيتي
ألاقي صد وجور
وأمشي في طريق غير سكتي
طريق تهت فيه عن أمنيتي
عايشه فيها وحدتي
طب أعمل إيه فيها دُنيتي
أمانه عَليك
أمانه عَليك ياصبر تِتكَلِم
إتكَلِم وإحكي
عن إللي شوفته مَعايا م الأول
عن قِصة كِفاح وعَذاب
وجَرح مِن أقرَب الأحباب
لا لَقيت حَنان ِمنهم
ولا نَفَع فيهم عِتَاب
ياصَبر
ياصَبر ماأنا قولت لك م الأول
إنك معايا مِش راح تتحَمل
دا أنا صَبري يفوق أيوب
ولا باتعَلم ولا عُمري باتوب
دا نَصِيبي في دُنيتي
رِزقي وقَدر مَكتوب
فاأمانه عَليك ياصبر تِتحَمل
إنتَ إللي إرتَضيت رفقِتي
إنتَ إللي إرتَضيت تكون حَمال
مِن الأسِيه مَعايا حِمل جِبال
واليوم شَيفاك بَكيت
من رفقتي ومَليت
طَب ليه قَبلت م الأول
ياصَبر أمانه عَليك تِتحَمل
أمانه عَليك ياصَبر تِتحَمل

صفاء عبد ربه