يا مَعاليك:ْ
==-=--=-=-=
عشان نوصل..
وِنِعْلى..كلنا فْ دنيا
وعارفين..إنها فانية
فتحنا مِ النفاق..شبابيك
ونقبل نَقْدي..
وبْنِقبل..كمان بالشيك
عشان نقدر..ومِن برة..
نكون مَنْظَر..وباين شيك
ورب الكون..
إذا مَرة..بِنِحتاجله!
مافيش مرة..نقول فيها..
سيادتك..وللا يا معاليك
يا عالم مين..هنا يِقدَر
يِعْمِل لِلنفوس..دي فْنِيكْ
يكون أقوى..من التشكيك
عشان يِمْكِن يِأثَر..
أيْوَة..فِيَ وْفيك
ياريت..كان فيه..
نِفوس..سيراميك
دعيت ربي..وبترجاه..
نغير طبع..دام فينا
تراب دافن..حاجات حلوة..
تِجَمِل..نَفسِنا فينا
ونِبقى بْجد..مِن جُوَّى..
شبه برة..حقيقي أنيق
وِبَدعي من صَميم قلبي..
نِنام والنوم..
يكون فعلا..بجد عميق
وِ تِصْحى..حد متغير
بِترفُض مين ينافِق فيك
ولو بنفاقه..بيضِلَّك..
بِسيادتك..ويامعاليك ... !!
ليست هناك تعليقات:
إرسال تعليق