بنتى الحبيبه بقلم / عماد الدين على

............بنتى الحبيبه ..............
بكدب عليكى
ف كل حاجه تسعدك
وساعات أألف
قصه تروى بسمتك
واعمل غنى
وانا مستلف
عشان اجيب لك لعبتك
واعمل شجاع
وقتلت لاجل ما طمنك
حبة ضباع
وابقى مريض
وبرتجف
وان قلتى مالك ؟
اقول دلع
حبة صداع
- يا بابا شيلنى
-حاضر
واشيلك فوق كتافى
المنهكه
وأميل بعودى المرتوى
حركه اليمه ومضحكه
فتضحكى
فافرح
واصرخ
بضحكه واه متشبكه
ومتفبركه
بكدب عليكى
لما اقول
انا مش غبى
وانى عمرى ما اخطى خطوه
الا بالصلاه ع النبى
وانى سعيد
وان عزمى ف الشدايد
كالحديد
وكل ليله
بعد ما تنامى سعيده
فى فرشتك
يطفح على جسمى الوجع
ينهار فؤادى
اللى كان
عامل جدع
وابات اطيب ف الجراح
وازاى يطيب الجرح
بعد اما أتطبع
تطلع لى شمس الصبح
ادارى شكوتى
والبس وشوش الفرح
واكتم أنتى
وبكل رقه
اصحيكى
لاجل ابتدى
من جديد ...
..
..
اكدب عليكى
...........................
بقلم / عماد الدين على