كتبـــــــــــت جـــــــواب --- بقلـــــــم الشاعــــــــر / هشــام عـــوض محمـــــــد

كتبـــــــــــت جـــــــواب 

بقلـــــــم الشاعــــــــر

هشــام عـــوض محمـــــــد

كتبت جواب لمحبوبي 

مليته بوصفي للإحساس 

بدأته بإمتى هتدوبي 

أنا مـ الحب دبت خلاص 

-

وليه عِندك وآخره يكون 

مفيش كلمه تريحني 

حبيب قلبي هواكي جنون 

وصدك ليا جرّحني 

-

بسهم عينيكي صاب قلبي 

وطار نومي واخره هلاك 

وطول ليلي بشوف غُلبي 

ونفسي فـ طله مـ الشباك 

-

يجوز مره أشوفك فيه 

وتيجي عينيا فـ عنيكي 

وقلبي يجوز تحني عليه 

تردي سلامي بإيديكي 

-

حزين قلبي ونار قايده 

عشان حبك مبهدلني 

منايا دا كله فيه فايده 

وتبقي عينيا والنني 

-

ياريت بسمه تكونلي دليل 

تقْولّي هتبقى ويايا 

ولو حتى شربت الويل 

وجودك عندي بكفايه 

-

كتبت بدمي مكتوبي 

ياريت وبسرعه جاوبي عليه 

تردي فـ حبي بتدوبي 

عشان أرتاح من اللي انا فيه 

-

في آخر كلمه بكتبلك 

بحبك حب مش معقول 

ونفسي فـ رد يشبهلك 

ويبقى الوصل فيه مقبول 

بقلمــــــــــــــــ 

هشام عوض محـمد 

فــــى

الثـــــلاثــــــــــــاء

31 / 03 / 2015 م