&& ياخربيتك &&زجل// محمد فتحي عبد الغني

ساعات أحس بالدنيا محوطاني
وساعات أحس بيها مشحططاني
وساعات تضحك عليه و تحضني
آجي أصدقها تضربني ف سناني
،،،،،،،،،،،،،،،،،،،،،،،،،،،،،،،،،،،،،،،
قوليلي ياخربيتك ملتك إنتي آيه
لاراضية تعتقيني أنا عملتلك آيه
لاعاوزه ولاعاوزك مرة تندهيلي
عملت لك بهلوان وبرضو يالهوي
،،،،،،،،،،،،،،،،،،،،،،،،،،،،،،،،،،،،،،
عليوة عامل باشا ودماغة مقلوبة
لاعارف ف الأصول ولاناوي ع التوبة
وكل يوم فخ ومقالب ملهاش حصر
فرحان بغباؤه لابسه ع الموضـــــة
،،،،،،،،،،،،،،،،،،،،،،،،،،،،،،،،،،،،،،،،،،
عفاف عاملة برنسيسة متشخلعة
حاطة كيلو بودرة والجزمة مفرقعة
تقولش مــــدرعة وشايلة ديناميت
إن جيتو للصراحة ناقصها البردعـة
،،،،،،،،،،،،،،،،،،،،،،،،،،،،،،،،،،،،،،،،،،
توتو نافخ عضـــل وعامل واد رياضي
بقى شكله زي العجل يخيبه الفاضي
غير كل ملامحه تشوفو زي التــــــور
تيجي تكلمه يتحسر علي الماضي
،،،،،،،،،،،،،،،،،،،،،،،،،،،،،،،،،،،،،،،،،،،،
الحب أصبح موضة ولابس كام قناع
ماعادش غير شوفه وتسلية وانباع
واللي يقول بحبك وتاني يوم يبيعك
واللي يشوف غيره يفكر ف اختراع