* ذكريات * بقلم / رضا ابو الغيط

* ذكريات *
همس ف ودنى
شريط الذكريات
وقالى دور ف الصور
افتح وهات... الألبومات
ومن سُكات
ووسط كراكيب الزمن
رحت أدور ع اللى تايه مننا
وف ايدى شامعه
نورها كان من صبرنا
ساند على عكاز عجوز
أكبر كتير من عُمرنا

وبعد ما حوطنى القلق
وف لحظه زهق
قبل الشموع ما تنطفى
والصبر منى يختفى
شافت عيونى حبة ورق
متنطورين
على سطح امسى اللى انسرق
والريحه طاله ف المكان
ريحة عرق
معرفش ليه
خفت اقرب منهم ؟
شاف اللى فاضل من نظر
دخان كثيف
خارج حدود المبخره
وسمعت صوت
من بين جدار المندره
سامعه كأنه
وحى نازل م السما
نادى وشاور ع الورق
( قوم لمهم )
امسح بإيدك التراب
من فوق كتفهم
وفوق كتافك يا ولا
( شيل همهم )
سمعت صوت من بين ضلوعى
بيسأله
( دول يبقوا مين )
ضحك ورد الأسئله
لساك حزين ؟
لسه بتسأل يا ولا
(دول يبقوا مين )
مين اللى شالك ف الصغر
وخاف عليك؟
يا فرع اخضر ف الشجر
مين اللى كحل فرحته
بنور عينيك ؟
مين اللى ضحى بدنيته
لأجل يلاقيك ؟
لسه بتسأل ياولا ؟
ولا خلاص
شافت عينيك
رضا ابو الغيط