انا اسف على ناس بتحبك
بطريقة الضرب على قفاهم
لو حبى يا مصر انى اتهانلك
واتذل وابوس ايد اعدائك
والاسم سلام بحمى بلادك
فانا اسف مقدرتش اكونلك
واحد م الشله من اياهم
معلش عشان عندى كرامه
وبقولها بجد وبأمانه
لو عايزه ف يوم جنبك راجل
فانا اكتر شعب الكون عارف
بيعيش برجوله و بشهامه
فبلاش وحياتك تدايقى
مقدرتش اكون من شلتهم
انا واحد من مليون ماتوا
علشان حبوكى بطريقتهم
فينا اللى اتقال عنه ده خاين
فينا اللى اتداس من جزمتهم
ف الاخر متنا عشان اسمك
سبناكى لوحدك بتعانى
والكل بينهش من جسمك
وانا عارف مش راجعين تانى
ووجودنا خلاص بعتبره عدم
مبقاش ينفع دلوقتى ندم
ف ياريت تبتسمى وتنسينا
مانا برضه زمان كنت ف جيشك
وخدمت ف ارضك وف سينا
وانا لسه بقول انك طاهره
مع ان كتير قالو دى فاجره
سرقوكى وبرضه انتى مكانك
سامحينى عشان مت عشانك
بس اللى مأثر وقاهرنى
انا شفت عدوى ف احضانك
وانتى بتضحكى وبتتمايلى
بتبوسى ايديه وبتتحايلى
انا فاكر ناس من حتتنا
يوم موتى اتقسموا على الجنبين
فيه جنب يقول كلب وخاين
والتانى حزين
كان نفسى بجد ف يوم موتى
تاخدينى ف صدرك بالاحضان
وتقولى لكل الناس ابنى
مش خاين ابنى ده كان انسان
وتضمى ف كل اللى بقيلى
ودموعك تنزل تغسلنى
وساعتها هحس الموته امان
انا اسف علشان حبيتك
صدقت بجد انك امى
ميادينك تشهد على حبى
وترابك غرقان من دمى
انا اسف علشان غنيتك
وكتبت عليكى حروف اسمى
انا اسف علشان سبيتك
وانا روحى بتطلع من جسمى
انا اسف على ناس حبونا
وبدم رخيص ودعناهم
انا اسف مقدرتش اكونلك
واحد م الشله من اياهم
ليست هناك تعليقات:
إرسال تعليق