&& لمّا && بقلم / محمد عبد اللطيف

لمّا تِطلع م الربيع
أوصيك ياصاحبي
تتسجن جوّا الخريف !
حلوه أنّات الورق ساعة السقوط
حلو الهبوط من ع الشجر لمّا يضيع
لمّا يفارق الغصون
لمّا يغادر الحصون
حلو الخريف لمّا الربيع مانقدّروش
لمّا يموت بايدين أسير وما نحمهوش
إرحل لناس يمكن يحسّوا بالوجود
يمكن يدافعو ع الربيع وما يندموش
#############
لمّا تِطلع م الربيع :
وفّر صُراخك تسمعوا
وفّر عبيرك تِجمعوا
وقّف دموعك ع اللي كانوا بيحلموا :
ماتوا الجميع
#############
لمّا تِطلع م الربيع
تِلقى التحايا شئ فظيع !
تِلقى اللي دافع والمنيع
تلقى المقاوم والشجيع
مابيتهانوش
مابيتلاموش !
#############
لمّا تِطلع م الربيع
والذكرى بتراود ما كان
والفكره مُش جوّا المكان
يبقا الملامه ع الزمان
مُش ع القطيع !
#############
لمّا تِطلع م الربيع
إوصفلنا شكل الربيع
إوصفلنا لونوا البديع
واحدفلنا منوا الريحان
واقطفلنا منو الطبيع
واقفل بيبانوا يستريح
يستريح ونستريح
يمكن نموت ومانلحقوش
يمكن نموت من غير ربيع !