عن الفلاح
*******
فلاح ! وزارع أرضه بسلاحه
يقوم بدرى على أرضه
صاينها بطوله وبعرضه
وفاسه شايلها على ايده
ويوم جنيه دا يوم عيده
سلاح الصبر مفتاحه
ليالى الحر تشتاق له
ساعات الصبح تنده له
سنين الفقر تدقدق له
بيعرق من جبين الأرض
ايديه من الشقا بتعرض
وأيامه عليه بتعض
ومحصوله خلاص طارح
لكن فى الحسبه مش فالح
يوم يجرى على الشونه
يلاقى الشونه مسكونه
يقوم راجع مع حماره
مِخَزن غلته ف داره
وحبة ملح ويا حبوب
يخزن غلته المنكوب
كلام بنعيده بالمقلوب
عن الفلاح عن المغلوب
فلاحنا أخر أحواله
دلوقتى متشقلب حاله
الكل بيقطع لحمه
تكاليف زراعتة مابتسامحه
تحديد زراعته ماتسمح له
انه يعوض فى خسارته
والكل متشفى فى حالته
حكومتنا أصلها من حده
ونصيبه منها على قده
سعر الكيماوى ودا زاد حده
حتى التقاوى مابتسده
طب يعمل ايه سيدنا الفلاح
قلع خلاص شحر التفاح
وخضاره يطرح بكا ونواح
وحكومه سدا فى ودانها
مبيدات مسرطنه لولادها
أمراض مانعرف أسبابها
ايه بس جالنا وايه جالها
ياحكومه رقى على الفلاح
حنى وطلى عليه بسماح
أصل الحكايه بقت كوسه
فلاحنا عايش فى الحوسه
لا نفعه طبله معاه ولازار
أخرتها واقف كدا محتار
ودى حكايتنا عن الفلاح
عذاب حياته مسا وصباح
ياناس كفايه عليه وسماح
ليست هناك تعليقات:
إرسال تعليق