مـــجــنــون . بقلم أحمد شاهين
مجنون أنا . والفكره مش فكرة جنون
إنــمــا . قتلت قلبى بالظنون
فكرت فيها إنها ممكن تخون
وتسيبنى زى طير وشارد فى الفضا
ضعيف وحاسس بالرضا
وحياته صعبه فى كل وقت مُهدده
ريشه سراب. جناحاته إغتالها المدى
مجنون أنا
وكل أفكارى سُدى
*****************************
ممكن أكون ف لحظه بهرب من حواسى
أو إنى بعمل فيها ناسى
وببدل الصوت بالصدى
واسمع كلام كله خداع... وبصدقه
مجنون أنا
بيضيع فى إيدى الشئ ف لحظه
والناس دى عارفانى وملاحظه
إنى مُتهور سريع
قتلت وردى فى الربيع
وفى الخريف أفضل أدور
ع الزهور
يمكن بلف حوالين جريمتى
وافضل أدور
******************************
مجنون أنا
ضيعت من إيدى الكتير
وف لحظه يتحدد مصير
واندم وأبدل بالندم
حالة رضا
مجنون أنا
مُتسرع الحكم وبندم
ف كابوس وعامل إنى بحلم
بهرب كتير من دُنيتى
وف أخرتى الله أعلم
مجنون أنا
*******************************
زى الفراشه الطايره فى وسط الصقور
لا هاممها ضربه من جناح
هربانه من ظلمه لنور
وبتبتسم وبتترسم
وكأنها فى معرض صور
مجنون أنا
زى الغريق لما غرق
وبص للدنيا شهق
شهقة وداع
كان أيه ف إيده وقتها
وهو راحل جوا قاع
غير إنه ينطق بالشهاده
لكنه ضاع
******************************
مجنون أنا
والجنون هى الفنون
يعنى بسطر كل أحاسيسى بقلم
بندم كتير ولسه ما خلصش الندم
بتعلم ومن كل إللى فات
غرقان ف بحر الذكريات
لكن مصيرى للعدم
مجنون أنا
رغم الوجود رغم العهود
رغم القيم.
كلمات \ أحمد شاهين
15 \ 1 \ 2016
ليست هناك تعليقات:
إرسال تعليق