إبن.الحرام.com ()() بقلم..محمد عسل

إبن.الحرام.com

علي باب دخول الناس تصلي وتعترف..

مرمِي هنا عيل رضيع بيقول كلام..

من غير حروف لكن عياط وبيرتجف..

من غير كسوف إسمه ياناس إبن الحرام..

ملفوف ف شال خاين لدينُه منحرف..

ملفوف ف طرحة واحده عاشت ف الظلام..

عيل رضيع وسط السكات وبيشتكي..

وبيدعي ربه أصل كل الناس نيام..

سامع أنا صوت العياط عالي قوي... 

عارف أنا إن العياط شكوي وملام..

عاوز يقول البرد قاسي والهوا..

وإنه إنظلم وإنه إنجرح وإنه جعان..

عاوز يقول أنا ذنبي إيه أدفع أنا.. 

غلطة خسيس غلطة رخيص غلطة جبان..

ترميني ليه أمي الرخيصه المجرمه..

طاب كسبوا إيه من صرختي أو أخدوا كام؟ 

من أجل بعض من الدقايق ممتعه..

رح يخسروا طول الحياه معني السلام..

هما إسمهم أصبح بغاه من رميتي... 

وأنا بعدهم إسمي ياناس إبن الحرام.

بقلم..محمد عسل