&& يضيق صدري && بقلم / محمد عبد اللطيف

يضيق صدرك !
وصعب الصمت بعد البوح !
وصعب إيدين أصيل تتلام !
عشان .. (خاطري ) !
عشان الماضي والأيام
أنا مجروح .. ومطعون بِيّدّ أحباب
مانيش شايل ف صدري خراب
ولا بياع ولا هدّام

أنا شاري عناق أصحاب
أنا مشنوق .. وشنّاقي
(ونيس العُمر والمشوار )
ياليل يانهار :
مافيش تالت ف غُربة ويل ؟
مافيش بُشره يعود النيل ؟
تعود الخُضره والنوّار ؟
قرار بتّار !

ومقفوله ف وشي ابواب
مانيش خايف أموت ع الباب
يدوب الكف م التخبيط
ويفتحلي الصدود وارجع
والِفّ واعود
واعاود عزف أناتي
أنا شحات وكلمة حق ترويني
لايوم كان العِدا بيني
وبين من كانوا نور عيني

أنا بخبط على جبيني
وأنادي الحيطه صحيني
يادم أحمر يسيل م القلب قبل العين
مافيش لون تاني مني يسيل ؟
مافيش دمعايه تحرقني
تسطّر صدق ع الخدين !

أهاجر فين ؟
واهاجر مين ؟
مانا مهجور وف بلادي
مابين سجنين وجلادي
بيوفي الدين !
يزيد أكتر على دينه
كريم ويّاي مُش بخلان
بحقّ العِشره والخلّان !

يضيق صدري :
واحوش تنفجر مني
رعدة صرخه م النني
تزلزلني ..
توقعني ..
فيسندني ..
بإيده الحمرا يعدلني !
تقوم الذكرى تاني تعود
واموت من تاني ..
فيجلدني .. يصحيني ..
وافوق .. واشتاق اموت تاني
يضيق صدري
فيجلدني بدين تاني !